Strandhreinsun Hampiðjunnar, starfsmannafélags Hampiðjunnar og Bláa Hersins var 29. ágúst s.l., og í þetta skipti tók 50 manna harðsnúinn hópur starfsmanna og fjölskyldumeðlima þeirra þátt í þessum árlega viðburði.

Frá facebook síðu Hampiðjunnar:

“Við tókum fyrir fjöruna austan Selvogsvita og náðum að hreinsa fullkomlega rúmlega 600 metra. Forseti Íslands, Guðni Th. Jóhannesson, heiðraði okkur með nærveru sinni og lagði mikið á sig og var óþreytandi að tína upp rusl sem hefur skolað upp á stöndina undanfarin ár og áratugi.

Hildur Hauksdóttir, sérfræðingur SFS, Samtaka Fyrirtækja í Sjávarútvegi lét heldur ekki sitt eftir liggja og lagði góðu málefni lið. Tómas Knútson hjá Bláa Hernum skipulagði viðburðinn með okkur og á hann miklar þakkir skildar fyrir allt sitt ötula umhverfisstarf með okkur og öðrum.

Afraksturinn var kúfaður hálfgámur á vörubílnum okkar ásamt fullfermdri kerru Bláa Hersins og væntanlega er magnið á bilinu 5-8 tonn en við fáum að vita það betur á morgun þegar allt verður vigtað.

Allir sem komu að þessum hreinsunardegi eiga mikið hrós skilið og áttu vonandi góðan og gefandi dag!”

Myndir

Mynd: facebook / Hampiðjan